Irido el un electrician na incidente de tiro myentras con el dos mga suspechao enseguidas ya puede aresta el pulisiya miyerkoles madrogada aqui na ciudad.
Asegun con Police Major Albin Cabayacruz, el hefe del Zamboanga City Police Office (ZCPO) Station 5, el incidente ya ocuri mga alas 2:45 myerkoles madrogada na Barangay Lunzuran, este ciudad.
Si Cabayacruz ya nombra con el victima como si Ray Abila Peralta, un electrician y residente de Barangay Mercedes, este ciudad.
Base na investigacion cay ta maneja si Peralta su motorsiclo na “by-pass road” cuando ya tira conele dos mga suspechao quien muntao na otro motorsiclo y ta sigi atras de victima.
Con el victima ya lleba na hospital myentras el mga suspechao ya escapa para na direccion del Barangay Lumbangan.
Myentrastanto, asegun con Cabayacruz cay con el dos suspechao ya puede sila aresta despues del incidente base na testimonia del victima.
Ya nombra si Cabayacruz con el mga suspechao como canda Edgardo Lambo, Jr. y si Dave Atana con quien ya puede aresta na residencia de Lambo na Barangay Lunzuran.
Si Cabayacruz ya habla cay base na investigacion, el mga suspechao mga amigo del victima.
Asegun cay hunto el dos suspechao con el victima ta maneja motor na “by-pass road” y ta buska onde puede come.
El pulis ya puede recubri na lugar del crimen sinco capsula del calibre 45 pistola. (B. Garcia)