El governador del provincia del Zamboanga del Sur, si Victor Yu, ya pidi con el nuevo director rehyonal del “Land Transportation Office (LTO)” Nasser Mastura para implementa estrictamente con el “no helmet, no travel policy.”
Si Yu ya ase su pidimiento cuando ya visita conele na oficina si Mastura na capitolyo del Zamboanga del Sur del martes.
Presente tamen na oficina de Yu su esposa, si Congresista Divina Grace del primer distrito del Zamboanga del Sur y su hija, si Congresista Victoria del segundo distrito del mismo provincia.
Particularmente, si Yu quiere implementa con el “no helmet, no travel policy” na ciudad de Pagadian, el cabesera del provincia, por causa mucho accidente de motorsiclo ta susede y hinde ta usa helmet el mga chufer y el ankas na motor.
Ya pidi si Yu con Mastura para implementa tamen el “drunk driving policy” que estipulao bajo na “Republic Act 10586.”
Durante su visitada con Yu, con Mastura ya accompanya si Congresista Bai Dimple Mastura del Maguindanao, y otro mga oficiales del LTO na Rehyon 9. (B. Garcia, photo courtesy of Zamboanga del Sur Exposa Facebook page)