Zamboanga: DSWD ya dale ayuda financial con mga victima de ensendio

0
7

El Department of Social Welfare and Development (DSWD) ya distribuji P2.4 milyones ayuda financial con 240 familyares victima de ensendio del Agosto 22 na Barangay Camino Nuevo, aqui na ciudad del Zamboanga.

Asegun con el DSWD el distribucion del ayuda financial que ya facilita el City Social Welfare and Development Office (CSWDO) ya ase del Lunes tarde na lugar de actividades del KCC Mall de Zamboanga.

Cada un familya victima del ensendio ya recivi P10,000 ayuda financial que ta forma parte del “Assistance to Individuals in Crisis Situation (AICS)” del DSWD.

El objeto del AICS amo para dale alivio y ayuda con el mga afectao familyares del ensendio sobre el de ila imidietamente necesidades.

Fuera con el ayuda financial, ya recivi tamen mga paketes de comida, galamiton de cusina, “hygiene kits”, y otros pa mga cosas de ayuda ambos con el govierno local y nacional.

El Alcalde John Dalipe yam un hunto con mga personajes del DSWD durante el distribucion del ayuda financial con mga afectao familyares.

Myentras tanto, ya promete si Dalipe cay ay continua ayuda con mga afectao familyares na proceso de recuperacion para ayuda canila reconstruji de ila vida. (B. Garcia, photo courtesy of Department of Social Welfare and Development)

Leave a Reply