Cuatro chufer clasificao como mga nuevo conosido y un “watch-listed” suspechao el ya aresta myentras mas de P1.7 milyones valor de shabu el ya confisca mga otoridad na dos separao campanya contra droga ilegal aqui na ciudad de Zamboanga.
Si Police Colonel Alexander Lorenzo, el Zamboanga City Police Office (ZCPO) director, ya nombra con el cuatro arestao chufer como canda Aldadin Sahirul, 31; William Murpin, 29; Jheng Juni, 36; y si Aljasim Jamiri, 35 años el edad.
Asegun con Lorenzo con el cuatro chufer ya aresta na un “buy-bust operation” mga alas 8:42 del Lunes denoche na Sitio Stanvac, Barangay Kampung Islam, ciudad de Zamboanga.
Asegun con Lorenzo ya puede confisca na posesion del mga suspechao nueve pakete de plastic que ya contene 250.31 gramos del suspechao shabu que tiene el valor de P1,702,108, dos bags, dos bandel de sien pedaso P100 “boodle money” mesklao in verdadero P500 como markao sen.
Con el arestao watch-listed suspechao ya conose como si Rufino Tampua, 46 años el edad y residente de Barangay Zambowood, este ciudad.
Asegun con Lorenzo cay con Tampua ya aresta na un buy-bust operation mga alas 11:44 del Lunes denoche na Calle Don Toribio, Barangay Tetuan, este ciudad.
Si Lorenzo ya habla cay ya puede recubri na posesion de Tampua 10 gramos de suspechao shabu enpaketao na ocho pakete de plastic con el valor de P68,000, y P200 markao sen.
Asegun con Lorenzo detenido el mga suspechao myentras ta prepara el mga necesaryo documentos para planta formal asunto encontra canila por violacion del “Comprehensive Dangerous Drugs Act of 2002”. (B. Garcia, photo courtesy of Zamboanga City Police Office)