El “Local School Board (LSB)” que ta encabesa el Alcalde John Dalipe ya aprova el nombramiento del 111 maestra y maestro con quien ay designa na diferentes escuelas publicas de elementarya y segundarya aqui na ciudad de Zamboanga.
Asegun con Dalipe cay el mga maestra y maestro que ya empleya por medio del LSB ay omenta con el mga personajes del Departamento de Educacion (DepEd) con el objeto para mejora el proporcion del maestro-estudiantes y con definitiva mejora con el calidad de educacion.
Asegun con el DepEd cay tiene el total de 214,506 estudiantes el ya registra na escuelas publicas y privado para el año del escuela 2023-2024.
Na total de 214,506 estudiantes, 188,711 de ila el ya registra na escuelas publicas, 24,011 na escuelas privado y 1,722 na mga universidad y colegio.
Si Dalipe ya administra con el juramiento de trabajo del 111 mga maestro y maestra durante un ceremonya na City Hall del Lunes tarde.
Myentras tanto, ya administra tamen si Dalipe el juramiento del trabajo del 20 empleyado ya subi el ranggo y nuevo employao quien designao na diferentes departamento del govierno local. (B. Garcia, photo courtesy of City Hall PIO)