El Departamento de Obras Publicas y Carreteras, o DPWH, exitosamente ya completa el implimentacion del P90 millones camino de acceso na provincia del Zamboanga Sibugay mejorando el tansporte local del mga motoristas.
Asegun con el oficina regional del DPWH del Martes, el nuevo completao camino de acceso ta conecta con el Barangay Bulansing na municipio de Naga, Zamboanga Sibugay, para na Barangay Palomic na municipio de Titay, na mismo provincia.
Asegun con el DPWH, el nuevo cementao camino tiene el largor de 2.44 kilometros con allocacion desde’l Ley General de Asignaciones de 2023.
El DPWH ya habla, tiene el estimao 41,743 residentes, base na 2020 censo, el quien hay beneficia con el nuevo cementao camino.
El camino esperansao mejora el conectividad de servicio esencial como escuelas y instalaciones de salud, garantizando mas segurao y mas rapido viaje diario para con mga residentes.
Ademas, el mga siembradores puede ya ahora entrega de ila productos agricultural con un reducido hora de viaje dentro de 15 hasta 20 minutos.
Con el proyecto ya implementa el Oficina del Segundo Distrito de Ingenieria del DPWH na Zamboanga Sibugay. (B. Garcia)