El mga autoridad ya confisca mas de media millon de pesos valor de contrabando na un operacion de aplicacion de ley na provincia del Zamboanga Sibugay, asegun con el policia del Miercoles.
Asegun con el mando regional del policia, o Police Regional Office-9 (PRO-9), con el mga contrabando ya confisca mga alas 10:40 del Lunes denoche na canto’y rio na Purok Jupiter, Barangay Bangkerohan, Ipil, el capital del provincia de Zamboanga Sibugay.
Asegun con el policia, nohay con quien ya aresta siendo el dos desconocidos personas con quien ya columbra ta hace camada con el mga cajon de cigarillo ya istindi cuando ya gole sila el presencia del mga pulis.
El mga operativas ya recubri na canto’y rio del Purok Jupiter 10 cajon de cigarillo que tiene el estimao valor de P573,000.
Con el mga confiscao cajon de cigarillos ya lleva na quartel provincial del policia para el documentacion.
Asegun con el policia, con el mga confiscao cigarillo hay entrega na Buro de Aduana para el propio disposicion. (B. Garcia)