El Departamento de Obras Publicas y Carreteras o DPWH ya completa con el P24.9 millon proyectos de camino acceso para mejora el conectividad del mga lejanos comunidad na mga municipios del Mahayag y San Miguel na Provincial del Zamboanga del Sur.
Asegun con Cayamombao Dia, El Director Regional del DPWH, ta beneficia ahora el mga siembrador con el 933.7 metros cementao camino de granja para na tianggue na Barangay Upper Salug Daku na municipio del Mahayag.
El mga siembrador na Barangay Upper Salud Daku ta siembra y produci palay, coco y mais.
Si Dia ya habla, el 933.7 metros camino de granja para na tianggue que ya costa P14.9 millon ya construi el oficina de enginieria del primer distrito del DPWH na Zamboanga del Sur.
Asegun con Dia, el otro completao proyecto amo el construccion del 457-metros camino que ta conecta con el comunidad de indegenoso gentes na municipio del San Miguel.
Asegun con Dia, el vital camino de acceso que ya costa P10 millon ta facilita ahora el liso transportacion amediante el Barangay Poblacion y Purok 2 na Barangay Sayog, San Miguel.
Si Dia ya habla, el mejorao accesibilidad ay mejora con el comercio, abre mas oportunidad de desarollo para del comunidad de indegenoso gentes na lugar.
Asegun con Dia, puera el cementada del camino, el proyecto ta inclui tamen el instolacion de 30 luz solar para dale claridad durante el noche.
Si Dia ya habla, con el 457 metros proyecto vital camino de acceso ya implementa el oficina de enginieria del segundo distrito del DPWH na Zamboanga del Sur.
(B. Garcia)
