El Departamento de Obras Publicas y Carreteras, o DPWH, ya implementa el P12 millones cementada de “farm-to-market-road (FMR)” na uno del mga barrio na ciudad de Zamboanga con el objetivo proporciona mas seguro y mas eficiente acceso de transportacion para con mga residentes y siembradores.
Asegun con el DPWH, el nuevo cementao FMR locao na Sitio Muruk, Barangay Pasonanca, ciudad de Zamboanga.
El DPWH ya habla, el nuevo cementao camino tiene el largor de 154 metros de esquinita, proporcionando con mga residentes y motoristas con mas seguro y mas eficiente transportacion.
Antes ya completa el proyecto, el mga residentes del Sitio Muruk ta enfrenta desafios accede servicios esenciales, particularmente durante el tiempo’y ulan cay ta queda bien malandug y delicao del camino.
El mga siembrador, quien ta depende mucho na agricultura como de ila busca lavida, ta pasa dificultad transporta de ila productos para na mercado publico por causa umalin el condicion del camino.
Con el cementao camino, el mga siembrador de facil y eficiente ya ahora transporta de ila productos agricultural na mga grande mercado dentro y apuera del ciudad de Zamboanga.
El alocacion del fondo para na implementacion del proyecto estaba na Ley General de Asignaciones de 2023.
Con el proyecto ya implementa el oficina de ingenieria del DPWH na segundo distrito del ciudad de Zamboanga. (B. Garcia)