El Departamento de Obras Publicas y Carreteras o el Department of Public Works and Highways (DPWH) ay construi un proyecto de camino na este diversion para ayuda solva con el problema de trafico aqui na ciudad de Zamboanga.
El proyecto ay inclui el construccion de un viaducto (viaduct) principiando na Barangay Zone 4 para na Barrio de Mampang con el largor de 6.64 kilometros y 7.96 kilometros camino desde Mampang para na Barangay Culianan.
Asegun con Engiñera Lilibeth Rico, el hefe del informacion, educacion y comunicacion salvaguardia social (social safeguards) del DPWH, el viaducto de carretera ay sirvi como alternativo ruta con el existente camino del ciudad que ta experiencia trafico durante el hora de apuro.
El proyecto ay travesa con el mga barrio de Zone 4, Rio Hondo, Mariki, Talon-Talon, Mampang, Zambowood y Mercedes y aliñao con el proyecto del nuevo earopuerto internacional del ciudad.
En preparacion para el implementacion del proyecto, el DPWH ya conduci campaña de informacion desde Noviembre 9 hasta 13 y ay conduci “environmental baseline sampling” desde Noviembre 13 hasta 23.
Asegun con Rico, ay conduci tamen sila consultacion con otro mga concierne sector sobre el implementacion del proyecto.
Del Jueves, si Rico y su mga uban desde’l DPWH ya conferi con el Alcalde John Dalipe na City Hall y ya descuti sila sobre el proyecto que ay implementa por medio de un prestamo que ay ase el DPWH na Asian Development Bank.
Si Dalipe alegre cuando ya sabe ele aserca el implementacion del proyecto hablando cay ay ayuda este solva con el problema de trafico y ay contribui pa na economiya del ciudad. (B. Garcia, photo courtesy of City Hall PIO)