Un fescador ya muri mientras otro dos personas el irido na un accidente vehicular na costa oeste de este ciudad, asegun con el policia local del Lunes.
Asegun con el Zamboanga City Police Station 9 (ZCPS9) el accidente ya ocuri mga alas 2:58 del Lunes aga na Zone 3C, Barangay Cawit, en este ciudad.
Con el fatalidad ya conose como si Aljon Masbud, un pescador que tiene el edad de 25 hasta 30 años y residente de Purok 2B, Barangay Recodo, en este ciudad.
El dos irido victima conosido como canda Abdullajed Haile, 35 años el edad, un soldador y residente de Zone 3B, Barangay Cawit, y si Joel Ramos, 51, un residente de Barangay Talisayan.
Base na investigacion, ya man bangga con el tricycle que ya maneja si Masbud el trak que ta maneja si Ramos cuando ya man vuelta na camino el defunto para na direccion del pueblo.
Por causa na puersa del bangga-an, ya cay si Masbud y su pasajero, si Haile, na de ila tricycle.
Si Masbud, quien ya sufri irida na cabesa, ya muri na lugar del accidente mientras con Haile ya lleva para na hospital.
Si Ramos, quien nohay sinti duele durante el accidente, ta corre para na direccion del Barangay Ayala cuando ya man bangga le con el tricycle que ta maneja si Masbud, asegun con el policia. (B. Garcia, photo courtesy of Zamboanga City Police Office)