El dos maga tourist destination aqui na ciudad de Zamboanga el Isla de Sta. Cruz y Once Isla’s que ta man manipula el City Tourism Office equipao ya de speed boat cada un isla.
El Alcalde John Dalipe, Bise-Alcalde Josephine Pareja huntu con el maga miyembros del Consejo Local ya man turn over dos speedboat con el City Tourism Office que ta encabeza si Sarita Hernandez despues el flag raising ceremony endenantes aga na City Hall grounds.
Para episyente puwede man monitor con el maga actividad que ta conduci na dos mencionao isla, el dos speedboat tiene dos ciento horse power outboard marine engine cada uno. Ya man purchase este del anyo 2021 y cada un speed boat tiene balor de cinco punto cinco milyon de pesos cada unu y el dos speedboat tiene total de onse million y equipao este radar, sonar, GPS, life vests, oxygen tanks, strobe lights, radio search lights, spine board y light range.
Presente tambien durante el turnover ceremony canda Consehal El King Omaga, Joel Esteban, Jimmy Villaflores, Fred Atilano, Jerome Santos y James Siason. (Cristine Falcasantos, photo courtesy of Mayor John Dalipe Facebook page)