El Alcalde John Dalipe ayer tarde ya dale premyo con el dos mga barrio aqui na ciudad que ya declara como “drug-cleared barangays” el Regional Oversight Committee on Barangay Drug Clearing (ROCBDC).
El mga beneficiaryo del premyo amo el barrio de Cacao y Calabasa que ya recivi el premyo de sincuenta mil de pesos cada uno.
Con el premyo ya recivi canda Erwin Barcelona y si Expedito Rebollos, hijo, mga barrio capitan del Cacao y Calabasa, respetivamente.
El ROCBDC ya declara drug cleared con el barrio de Cacao y Calabasa del April 25, este anio cuando ya covini na un hunta el comitiba.
Si Dalipe ya ase desapio con otro mga barangays para ase todo’l esfuerso alomenos puede tamen canila pone bajo el declaracion de drug-cleared barangays.
Tiene ya ahora el total de deci-seis barrio el declarao drug-cleared incluwido ya el mga barangay del Cacao y Calabasa.
El otro mga drug-cleared barangays amo el Licomo, Limaong, Sibulao, Tictapul, Tigbalabag, Lapakan, Tolosa, Landang Laum, Lanzones, Pasilmanta, Lumayang, Capisan, Dulian-Upper Bunguiao, y Pamucutan.
Myentras el Barangay Pangapuyan declarao este como un “unaffected barangay.” (Cristine Falcasantos, photos courtesy of John Dalipe Facebook page)