Veinte siete aplicantes el contratado en el acto, o hired on the spot (HOTS), mientras 50 otros el clasificao como cerca de contrataciones, o near hires, durante el 2025 Nationwide Job Fair que ya conduci del Viernes na KCC Mall de Zamboanga. Con el feria de empleo ya organiza el Departamento de Trabajo y Empleo, o DOLE, y otro mga concierne agencias incluido el ciudad de Zamboanga. El mga companias que ya contrata mga aplicantes en el acto ta inclui el Ace Hardware Phils. Inc., Jolly Management Solutions, Tandem Cedar Cypress Corporation (KCC Mall de Zamboanga), 3ME Manpower Services, and PH Global Jet Express (J&T Express Inc.). Mientras tanto, el DOLE ya habla cay el 50 cerca de contrataciones na final estado ya de empleo, necesita lang sila completa el final entrevista, somete requirimientos de preempleo, o esta bajo el necesario entreno antes que oficialmente principa trabaja. Asegun con el DOLE, con el feria de empleo ya participa el 27 companias local con 5,226 vacantes de dempleo y sinco agencias en el extranjero con 1,461 vacantes de empleo. Ademas, el actividad ya inclui un One-Stop Shop que ya ofrece servicios desde’l varias agencias gubernamentales asociadas que ya inclui el Social Security System (SSS), PhilHealth, Pag-IBIG Fund, y Philippine Statistics Authority (PSA), y otros pa. (B. Garcia)