Zamboanga: ‘DOH’ ta conduci ‘catch-up immunization’

0
12

El Departamento de Salud o el Department of Health (DOH) ta conduci “intensified routine and catch-up immunization” con el objeto para dale bakuna con 61,849 bata desde nuevo nacido hasta 23 meses el edad aqui na region.

Asegun con Dr. Augusto Manolo Alpichi, el hefe del Local Health Support Division del oficina regional del DOH, el catch-up immunization ya principia este dia de Lunes, Noviembre 13, hasta Noviembre 29.

Asegun con Alpichi, mga mayores puede sila lleva con el de ila mga anak na mga centros de salud, “rural” y “district health units”, privado clinica, y na “out-patient services departments” del mga hospital.

Asegun con Alpichi, ya establisa tamen sila hunto con el mga govierno local mga lugar donde puede dale bakuna con mga bata como na parada de bus, bazaar, mercao publico, y otro lugar donde mucho hente ta anda.

Si Alpichi ya habla cay tiene tamen mga personajes de salud quien ay visita casa-en-casa para dale bakuna con mga bata.

El mga bakuna que ta dale con mga bata amo contra para “Tuberculosis, Hepatitis B, Pentavalent, Oral Polio Vaccine, Inactivated Poliovirus Vaccine”, y para “Measles, Mumps and Rubella”.

Asegun con Dr. Reynalyn Elshazly, el coordinador del programa de “national immunization” del oficina regional de salud, tiene el total de 92,197 bata el debe dale bakuna pero 36 perciento lang o 31,190 de ila el tiene ya bakuna.

Si Elshazly ya habla cay tiene pa 61,849 bata nuevo nacido hasta 23 meses el edad el nohay bakuna. (B. Garcia, photo courtesy of DOH-9 Facebook page)

 

Leave a Reply