El Departamento de Media-Ambientes y Rescursos Naturales o el DENR ya pone bajo el curada medical con un pajaro conosido como el Eastern Grass Owl.
Asegun con el portavoz del oficina rehyonal del DENR Rosevirico Tan cay ta cuwida ahora con el pajaro alla na Regional Wildlife Rescue Center del agencia na Barangay Baclay, Tukuran, Zamboanga del Sur.
Con el Pajaro Eastern Grass Owl ya puede encontra si Ronie Rey Rivera, un residente de Barangay Tawagan Norte, Labangan, Zamboanga del Sur, myentras ele y su maga companieros ta busca palaka del noche de Agosto dies.
Enseguidas si Rivera ya reporta y entrega con el maluya pajaro con maga personajes del DENR na ciudad de Pagadian.
Maga personajes de DENR ya lleva tamen con el pajaro na rescue center para ase el curada siendo tiene este irida.
Asegun con Tan con el pajaro ay larga sila otravez na monte si bueno ya el irida y na buen salud ya el Eastern Grass Owl.
Ta apela si Tan con el publico para enseguidas reporta canila el momento puede sila encontra maga pajaro o animal de monte na de ila lugar. (Bong Garcia, Jr., photo courtesy of Department of Environment and Natural Resources)
