El Departamento de Medio Ambientes y Recursos Naturales, o DENR, por medio del Oficina Comunitaria de Medio Ambiente y Recursos Naturales, o CENRO, na Liloy, Zamboanga del Norte, ya larga 88 anak de turtuga “hawksbill” para na de ila habitat natural, asegun con el DENR del Domingo.
El DENR-Zamboanga Peninsula ya habla con el mga anak de turtuga ya larga del Martes na canto’y aplaya del Barangay Patawag, Liloy, Zamboanga del Norte.
Ya chuca el mga anak del turtuga y ya cuida na un pugaran que ya atende el mga residentes del Barangay Patawag bajo el supervision del mga personajes del CENRO-Liloy.
El DENR-Zamboanga Peninsula ya habla el esfuerzo de cuidada ya vene despues que ya descubri 124 huebos de turtuga si Luzminda Lubandino, un residente del Barangay Patawag.
“Despues de 63 dias de incubacion, ya chuca el mga turtuga y ya prepara canila para larga na de ila habitat natural. Del Noviembre 5, con el mga anak del turtuga ya larga para principia sila de ila viaje para na de ila natural lugar,” el DENR-Zamboanga Peninsula ya habla na un declaracion.
“El objetivo del esfuerzo de conservacion amo para omenta el populacion de este especies, que ta enfrenta amenaso incluido perdicion de habitat, “poaching”, y cambio de clima,” asegun con el DENR-Zamboanga Peninsula.
El DENR ya habla, el largada del mga anak de turtuga ta demostra el papel del comunidades local na protejida del recursos naturales y formenta sostenable practica ambiental. (B. Garcia)