El mga autoridad ya aresta tres vendedor y ya confisca mas de P1 millon valor de droga ilegal na separao operaciones contra droga na Zamboanga Peninsula, asegun con el policia del Domingo.
Si Police Brigadier General Bowenn Joey Masauding, el director del mando regional del policia, nohay identifica con el tres arestao suspechao puera lang de habla’r cay todo sila mga hombre quien ta inclui un 33 años “street level individual (SLI)”, un 42 años siembrador de agar-agar, y un 33 años empleyado de circo.
Asegun con Masauding, con el SLI suspechao ya aresta na un operacion de compra busto mga alas 1:13 del Viernes aga na Purok African Daisy, Barangay Don Andres, Ipil, Zamboanga Sibugay.
Si Masauding ya habla, ya recubri na posesion del arestao suspechao P9,499.60 valor de suspechao shabu enpaquetao na siete termosellada transparente sobrecitos plastico y dinero de compra busto.
Asegun con Masauding, con el siembrador de agar-agar, markao como un “high-value individual (HVI)”, ya aresta el combinao grupo del pulis y soldao na segundo operacion de compra busto mga ala 1:57 del Viernes aga na Paseo de Omar, Barangay Arena Blanco, ciudad de Zamboanga.
Ya confisca na posesion del arestao suspechao HVI P1,020,000 valor de suspechao shabu y dinero de compra busto.
Si Masauding ya habla, con el empleyado de circo ya aresta na terser operacion de compra busto mga alas 2:33 del Viernes aga na Purok de Oro, Barangay Olingan, ciudad de Dipolog City, Zamboanga del Norte.
Ya habla si Masauding, ya confisca na posesion del arestao suspechao P13,600 valor de suspechao shabu enpaquetao na tres termosellada transparente sobrecitos plastico y dinero de compra busto.
Si Masauding ya comenda con el esfuerzos del todo envuelto operativas na exitoso operacions que ya demostra el dedicacion del mando regional del policia para pelya contra droga ilegal y proteje con el comunidad.
Si Masauding ya reitera cay el mga operaciones es parte del continuando esfuerzos para desmantela con mga sindicato de droga y previni el proliferacion del ilicito drogas na Zamboanga Peninsula. (B. Garcia)