Giawhag karon ni Ms. Maria Liza Tabilon, ang Schools Division Superintendent sa Zamboanga del Norte Division, Department of Education ang mga ginikanan nga ipalista na ang ilang mga anak alang sa umaabot nga klase karong Agosto 24.
Kini human nakita nga anaa pa sa 41% o 84,355 ang enrolees kutob kaniadtong Hunyo 17 sa tibuok probinsya gikan sa Kinder ngadto na sa Senior High School alang na sa School Year 2020-2021, diin ang enrolees sa senior high school maoy taas niini nga mitala na ug 9,162 enrolees o 99%.
Gibutyag ni Ms. Tabilon nga adunay 205,489 ka mga magtutungha ang gilauman nga nga makapag-enroll niing maong school year sa tibuok probinsya.
Niini, giawhag ni Ms. Tabilon ang mga ginikanan gikan sa Kinder hangtud na sa junior high school nga kinahanglan pa sa ilang giya nga ipalista na o ipa-enroll na ang mga bata aron malakip kini sa ihap sa ilang himuon nga learning materials/modules nga pagagamiton ning sahi nga matang sa klase gumikan sa giatubang nga pandemya karon sa tibuok kalibutan nga mao ang COVID-19.
Aron maseguro ang kaluwasan sa mga magtutungha, magtututudlo ug mga ginikanan batok ning maong sakit, gimando ni Presidente Rodgrigo Duterte nga walay face-to-face nga matang sa klase.
Ning maong school year, lahi ang learning modalities ang ipatuman karon sa Department of Education.
Tungod kay wala nay face-to-face, ipatuman nag distance learning sama sa on line class, modular ug gitun-an pa karon ang Radio, TV based instruction.
Sagupon usab sa DepEd ang Most Essential Learning Competencies (MELCs) nga ihatud ngadto sa multiple learning modalities and platforms.
Dugang ni Ms. Tabilon nga ang pagpatuman sa matang sa klase karon base sa DepEd Order No. 012 Series of 2020, ug walay kausaban niini, magpadayon ang klase sa Agosto 24.
Niini, giawhag ni Ms. Tabilon ang publiko nga mag-amping ilabi na nga anaa nay nagpositibo dinhi sa atong dapit. Magsuot ug mask kung anaa sa daghang tawo.
Nasayran nga ang enrollment molungtad kini karong Hunyo 30.