Mitala na lang karon sa duha ka active case sa COVID-19 ang Zamboanga del Norte kutob Agosto 20.
Kini ang nasayran gikan sa Task Force COVID-19 ning probinsya diin sa 32 ka kaso, duha na lamang ang aktibong kaso karon nga mao si Patient 031 ug ang bag-o nga si Patient 032.
Si Patient 032 usa ka 24 anyos, lalaki , taga lungsod sa Piñan ug usa ka Locally Stranded Indivudual (LSI) gikan sa Taguig City.
Kini ang nahidangat sa dakbayan sa Zamboanga lulan sa 2GO Shipping Lines kaniadtong Agosto 2, ug nahidangat usab sa lungsod sa Piñan sa susamang adlaw ug diretsong gi-isolate sa Isolation Facility sa maong lungsod.
Kini adunay temperature nga 38.2c, ug gipa-swab test sa Agosto 13 ug miresulta nga nagpositibo kaniadtong Agosto 18.
Sa pagkakaron, ang Zamboanga del Norte mitala ug 32 ka kaso sa COVID-19, 30 ang recoveries ug walay nakabsan sa kinabuhi niini.
Si Dr. Esmeralda Nadela, ang OIC sa Provincial Health Office ang nagkanayon nga ang tanang recoveries, gipailawum kini sa repeat swab test, aron maseguro nga luwas na kini gikan sa maong makamatay nga virus.
Apan bisan paman sa maong resulta, si Dr Nadela ang nagpahimangno nga mosunod gihapon sa health protocols sama sa social/physical distancing, magsuot ug face mask kung anaa sa publikong dapit ug batasanon usab ang paghugas sa kamot gamit ang sabon ug tubig no dili ba kaha magbutang ug alcohol aron malikayan ang pagkuyanap sa maong virus. (OIC Lyza Bautista, RPN DXKD Dipolog)Â
(Source: Provincial Information Center – Zamboanga del Norte)