Wala pa’y opisyal nga provincial poverty incidence ranking nga gipagawas sa Philippine Statistics Authority (PSA) alang sa tuig 2025 ug 2026, bisan pa sa nagkatag nga mga pahayag sa social media nga nag-ingon nga wala na ang Zamboanga del Norte sa listahan sa mga probinsya nga adunay taas nga poverty incidence.
Base sa pinakabag-ong datos sa PSA, ang giila nga opisyal nga basihan sa poverty incidence sa lebel sa probinsya mao gihapon ang 2023 Full-Year Official Poverty Statistics nga gipagawas niadtong Agosto 15, 2024. Ang maong report naglangkob sa regional, provincial, ug highly urbanized city poverty estimates nga gibase sa resulta sa 2023 Family Income and Expenditure Survey (FIES).
Busa, wala’y basehan ang mga pahayag nga adunay bag-ong provincial ranking alang sa 2025 o 2026 nga nagpakita nga nawala na sa listahan ang Zamboanga del Norte. Hangtod karon, wala pa’y gipagawas nga opisyal nga provincial poverty incidence estimates alang sa maong mga tuig.
Gipahinumdoman ang publiko nga magsalig lamang sa mga opisyal nga datos ug publikasyon gikan sa PSA sa pagtan-aw sa kahimtang sa kapobrehon sa nasud ug sa matag probinsya. Samtang wala pa’y bag-ong provincial poverty statistics nga gipagawas, ang 2023 Full-Year Official Poverty Statistics nagpabiling pinakabag-o nga opisyal nga reference sa maong mga datos.(IKEN B. GULLEM)
Source: Zanorte News Flash