El govierno local formalmente ya inagura del Jueves, con el primer y solamente centro de mendigos (mendicant center) na pais, na Barangay Culianan, en este ciudad.
El centro de mendigos que ya costa P21.5 millon, ay sirvi como temporario casa de mendicantes con quien ya cuji na mga calle del ciudad y donde ay dale mga programa y servicio para ayuda canila queda autosuficiente y eventualmente bira na sociedad.
Na su mensaje, el Alcalde John Dalipe ya habla cay el centro de mengidgos es un “testamento de diaton creencia cay todo miembros del de aton comunidad ta merese el oportunidad para el crecimiento y nohay ni uno el quien queda desatentido na de amon liderato”.
Asegun con Dalipe, el proyecto compuesto lang este del un articulo na largo lista de proyectos de infrastractura y programas que su administracion ya prepara y compli para lleva progreso y desarollo aqui na ciudad.
El hefe del City Social Welfare and Development Office Socorro Rojas ya rindi gracias con Dalipe por el suporta y guia con su oficina persegui el proyecto.
Con el centro de mendigos ya construe na 1,079 metro-cuadrado lote adentro na centro del govierno na Barangay Culianan donde talla tamen el Social Development Center, Women’s Crisis Center y el Children in Conflict with the Law center. (B. Garcia, photo courtesy of City Hall PIO)