Un nuevo reelegido oficial del barrio el ya muri na un incidente de tiroteo na costa oeste de este ciudad del Viernes aga.
Si Police Colonel Alexander Lorenzo, el Zamboanga City Police Office director, ya identifica con el fatalidad como si Serbelio Molina, 55 años el edad y el barrio capitan del Cawit, en este ciudad.
Asegun con Lorenzo, con Molina fatalmente ya tira mga alas 7:15 a.m. del Viernes aga na calle de Zone 4, Barangay Cawit, 13.35 kilometros oeste del ciudad.
Base na investigacion, ta maneja si Molina su motorsiclo de camino para na barangay hall cuando ya tira conele por cuantos beses el uno del dos desonosidos armao persona muntao na otro motorsiclo que ya sigi na atras de victima.
Si Molina ya sufri irida de bala na cabesa y pecho que ya resulta na su enseguidas muerte.
El mga suspechao ya escapa para na direccion del Barangay Tulungatung despues del incidente.
Ya recubri na lugar del crimen dos capsula del calibre .45 pistol y un bala del semehante calibre.
Asegun con Lorenzo, ta recivi amenaso na su vida si Molina antes y durante el periodo de eleccion y tiene le ya designa pulis para guardia conele.
Sin embargo, si Lorenzo ya habla cay ya debolbe ya si Molina con el de suyu mga guardia despues que hinde na le ta recivi amenaso.
“Tiene came patrulla de seguridad que ta conduci hasta na vicinidad del su residencia,” si Lorenzo ya habla.
El Zamboanga City Police Station 9 ta conduci un ondo investigacion para establisa si cosa el motivo y tambien identificacion del mga suspechao del incidente. (B. Garcia, photo courtesy by Ronda Regino Delos Santos)