El mga autoridad ya aresta tres objetivo de alto valor, o high-value targets (HVTs), cuando ya desmantela sila un cuarto de droga ilegal na un operacion contra droga na ciudad de Zamboanga.
El Philippine Drug Enforcement Agency (PDEA) ya identifica con el tres arestao HVTs como canda alias Oliver, 47 años el edad y mantenedor del cuarto de droga; alias Rex, 39, un empleyado del cuarto de droga; y, si alias Aj, 26, un visita.
Asegun con el PDEA-Zamboanga Peninsula, con el tres ya aresta durante un operacion de compra busto que ya resulta na desmantalada del cuarto de droga mga alas 6:50 del Lunes denoche na Sitio Picnic Ground, Purok 8, Barangay Tugbugan, ciudad de Zamboanga.
Asegun con el PDEA, ya puede confisca na cuarto del droga aproximidamente 12 gramos de suspechao shabu que tiene el valor de P81,600, dinero de compra busto, y mga parafernales de droga ilegal. El PDEA ya habla, con el operacion de compra busto ya conduci siguiendo el bisiada na ilegal actividades del mga arestao suspechao.
Asegun con el PDEA, con el mga suspechao hay planta el caso por violacion del Secciones 5, 6. 7, 11, 12, 13, y 14 del Ley Integral de Drogas Peligrosas de 2002.
El operacion de compra busto ya conduci el mga agentes del PDEA con el suporta del policia local. (B. Garcia)