El gobierno local, por medio del Oficina del Bienestar Social y Desrarollo o CSWDO, ta conduci evaluacion y ta perfila con el mga familias afectao na incendio que ya ocuri na Barangay Camino Nuevo del Lunes.
El Alcalde John Dalipe ya diriji con el CSWDO y mga concierne agencias del gobierno para asegura el lijero ayuda con mga afectao familias.
El bombero ya reporta cay 13 caserias el ya man uput na quema y 15 familias compuesto de 71 individuales el afectao.
Asegun con el bombero, nohay casualidad o ya iri durante el incendio que ya principia mga alas 3:32 del Lunes tarde y ya alcansa na segunco alarma.
Mientras ta hace el evaluacion, el mga personajes del CSWDO con el ayuda del mga oficiales del Barangay Camino Nuevo, ya distribui comida enpaquetao, incluido mga galamiton de cocina con mga afectao familiares.
Ya instola tamen carpas modulares na “covered court” que hay servi como temporario centro de evacuacion.
Mientras tanto, el bombero ta determina pa si cosa el causa del incendio que ya puede controla mga alas 3:40 del tarde y ya puede apaga completamente mga alas 4:55 del tarde.
El bombero ya pone el inicial estimao destroso de propiedad na mas o menos P50,000. (B. Garcia)