Maskin ya abaja na menos de siento el numero del caso del coronavirus disease 2019 (Covid-19) aqui na ciudad, el Covid-19 ta sirvi siempre de amenaso na salud del publico, especialmente entre maga de edad y enfermoso personas.
Ese el advertencia de Dr. Dulce Amor Miravite, el Hefe del oficina de salud local, hablando el ciudad de Zamboanga ya registra solamente tres nuevo caso llevando na total de sincuenta’y seis activo caso de Covid-19.
Asegun con Miravite cay el numero del hente ya recupera desde’l infeccion de Covid-19 tiene ya el suma total de treynta mil siento dies cay tiene ya registra seis nuevo recuperao paciente.
El numero del recuperao paciente ta representa noventa’y sinco porciento del suma total de confirmao caso de Covid-19 de treynta’y uno mil cuatro sientos noventa’y tres.
Siendo tiene pa siempre Covid-19 maskin bajo el numero de caso y tiene pa quien ta muri, ta conseja si Miravite con el publico particularmente aquellos vulnerable para toma firmi precaucion y usa maskara si ta anda sila na maga serao lugar y insuficiente el ventilacion.
Ta apela tamen si Miravite con aquellos quien ta atende maga hunta maskin na maga exterior lugar que continua lang siempre usa maskara para el de ila protection.
(B. Garcia)
