Si Coronel Bernard Samon, el comandante del 4th Special Forces Battalion, ya rindi despide con el provincia de Basilan durante su saler de llamada con Gobernador Jim Hataman-Salliman na capitolio provincial na ciudad de Isabela del Miercoles.
Como un acto de gratitud, si Samin ya presenta un Plaque de Apreciacion con Salliman por su invaluable suporta na campaña de paz y orden na provincia.
Si Samin ya servi con el Basilan por un año y seis meses, y bajo su liderato el 4th Special Forces Battalion ya tene excepcional acomplisimiento como el rindida del mga miembros del grupo Abu Sayyaf y recubrida del mga pusil sin licensia bajo el programa del “Small and Light Weapons” que ya suporta mucho el gobierno provincial.
Ya encabesa tamen si Samin con el fuerzas especiales na conducida del serie de actividades de extension medica na diferente municipio del Basilan.
Con Samin ya designa na mas alto posicion na quartel nacional y ya releva conele si Tiniente Coronel Ian Garceron.
Si Salliman ya expresa si deseo de mejor de las suertes con Samin na su nuevo designacion na servicio militar.
Ya rindi tamen gratitud si Salliman con Samin por su buen trabajo ya ase ele na Basilan, especialmente por su suporta na esfuerzos y programas del su administracion na mantencion de paz y orden na provincia.
(B. Garcia, photo courtesy of Ronda del Basilan)