Ta ase un ondo investigacion el pulisiya para alomenos sabe si quien el responsable na matansa del un oficial de comisionado de eleccion del un municipio na provincia de Basilan.
Asegun con Tiniente Coronel Junpikar Sitin, hefe del pulisiya na ciudad de Isabela cay con el victima ya conose como si Ruayna Sayyadi, el oficial de eleccion na municipio del Al-Barka, Basilan.
Asegun con Sitin cay con Sayyadi ya tira maga alas tres ayer tarde na Barangay Doña Ramona, ciudad de Isabela, Basilan.
Base na inicial investigacion cay si Sayyadi parao enfrente del satellite oficina de eleccion del Al-Barka cuando ya atraka el suspechao y ya tira con el oficial na detras.
Con Sayyadi ya lleva na hospital pero ya declara con ele muerto el doctor.
El suspechao ya munta na un motor y ya escapa para na direccion del pueblo de Isabela.
El incidente ya ocuri myentras ta conduci registracion de nuevo botante el comisionado de eleccion en preparacion para el benedero eleccion de barangay yn Sangguniang Kabataan (SK) na Deciembre sinco, este anio.
Myentrastanto, el abogao Roberto Dela Peña, el provincial election supervisor del comisionado de eleccion na Basilan, ya condena con el incidente que ya resulta na muerte de Sayyadi. (Bong Garcia)