Ya aresta mga pulis con un motorista despues ya descubri cay ta carga el ilegal droga na un checkpoint alli na Barangay Kasanyangan, este ciudad.
El pulisiya local ya nombra con el arestao motorista como si Zuher Ismael, veinte nueve anios el edad y residente de Manga Drive, Barangay Sta. Barbara.
Del primero, ya cuji mga pulis con Ismael ta maneja motor sin helmet.
Pero acccidentalmente, ya descubri mga pulis cay tiene ta lleba un pakete del suspecha shabu si Ismael cuando ya manda conele presenta su licensya para dale conele citation ticket.
Asegun con el pulisiya cay el droga ya descubri na posesyon de Ismael ya alcansa na cantidad de seis mil siento veinte pesos.
Con Ismael ya detene na Police Station 6 y ay planta conele asunto por violasyon del Comprehensive Dangerous Drugs Act of 2002. (April Boy Regino)