Sincuenta’y uno antes myembros del New People’s Army (NPA) na provincia del Zamboanga del Norte ya recivi ayuda financial del govierno para ayuda mejora de ila vida.
Si Tiniente Coronel Nolasco Coderos Hijo, comandante del 97th Infantry Battalion, ya habla cay ya ayuda sila con el Department of Social Welfare and Development (DSWD) distribuji con el ayuda financial del Lunes para con el maga antes rebelde NPA na de ila quartel na Barangay Del Pilar, Piñan, Zamboanga del Norte.
Cada uno del maga antes rebelde NPA ya recivi el cantidad de tres mil pesos.
El ayuda financial ya dale el DSWD intendido para ayuda con maga antes rebelde NPA por medio del Orden Ejecutivo Numbero Setenta or el como se llama Whole of Nation Approach to End Local Communist Armed Conflict (ELCAC).
Si Cledelou Zaragoza, el focal person del E.O. 70 del oficina rehyonal del DSWD amo ya encabesa na distribucion del ayuda financial.
Asegun con Coderos cay el dalida del ayuda financial solamente uno lang este del maga iniciativo del govierno para dale mira cay fiel sila na implementation del programa de ELCAC.
Omento pa de Coderos cay ay sirvi ya tamen este como un regalo para con el maga rebelde siendo ta aproxima ya el mes de Pascua.
Si Coderos ta ase el llamada para con aquellos maga rebelde NPA quien talli pa ta esta na monte para bira ya na lao del govierno y principia in pacifico y normal vida hunto con el de ila cada’y cual familya.
De mas temprano, el sincuenta’y uno antes rebelde NPA ya recivi ya ayuda por medio del Enhanced Comprehensive Local Integration Program na cantidad de sinco mil pesos para ayuda de buska vida y otro omento kinse mil pesos como ayuda financial puera pa con el pago na maga armas de fuego que ya entraga sila na govierno. (Bong Garcia, Jr., photo courtesy of 97th Infantry Battalion)