Un chufer el ya aresta y valor de P490,000 cantidad de contrabando el ya confisca mga autoridad aqui na ciudad de Zamboanga, el policia local ya reporta del Domingo.
Asegun con Coronel Alexander Lorenzo, el Zamboanga City Police Office director, con el arestao chufer ya conose como si Abdulgani Amil, 39 años el edad y residente de Logoy Diutay, Barangay Talon-Talon, en este ciudad.
Asegun con Lorenzo, con Amil ya aresta mga alas 6:45 del Viernes denoche na calle Kasalamatan, Barangay Kasanyangan, en este ciudad.
Si Lorenzo ya habla cay ta man patrulla el mga personajes del policia cuando ya columbra sila con Amil sintao na un parao vehiculo na calle Kasalamatan.
Asegun con Lorenzo, ya descubri el mga pulis cay ta contene 14 cajon de cigarillo con el valor de P490,000 cuando ya inspecciona sila con el vehiculo que ta maneja si Amil.
Asegun con Lorenzo, con Amil ya aresta y con el mga cigarillo ya confisca despues que nohay puede presenta el chufer mga documentos del su cargamento.
Con Amil, el mga cigarillo y el vehiculo ya lleva na quartel del Zamboanga City Police Station 6 para el propio documentacion y ay entrega despues na Buro de Aduana.
Mientras tanto, asegun con Lorenzo ta verifica sila si quien el dueño del vehiculo que ta maneja si Amil en coordinacion con el “Land Transportation Office”. (B. Garcia)