Un capataz de un compania de construccion el ya iri na accidente vehicular na costa este del ciudad, asegun con el policia local del Domingo.
Asegun con el policia local, el accidente ya ocuri mga alas 8:50 del Domingo aga na camino general del Maria Clara Lorenzo Lobregat, Barangay Cabaluay, 16 kilometros este del ciudad.
El policia local ya nombra con el victima como si Raden Dela Cruz, 44 años el edad, un residente de Barangay Curuan y capataz de un compania de construccion.
Asegun con el policia local, con Dela Cruz ya man bangga un coche que ta maneja si Sargento Al-Rashid Tiam-Wat, 37, y designao na Task Force Zamboanga.
Base na investigacion, ya man bangga si Tiam-Wat con Dela Cruz cuando ya bira su coche despues que ya usa le freno de mano cuando ya falla el freno de pies cay serca ya era tamen ele man bangga con un trak por causa ya man tuyu el soldao.
Asegun na investigacion, ya man tuyu si Tiam-Wat por causa sigiditos le ya rindi servicio militar y sin el propio descanso.
El accidente ya ocuri na fuente y paabajada el camino mientras ta viaja si Tiam-Wat para na Barangay Sangali.
Con Dela Cruz ya lleva na hospital para el curada medical. (B. Garcia, photo courtesy of Zamboanga City Police Office)