Dos personas, un chufer de jeep de pasajero y su cobrador de pasaje, el ya muri na un incidente de tiroteo aqui na ciudad de Zamboanga, asegun con el policia local del Domingo.
Asegun con el policia local, el incidente ya ocuri mga alas 12:50 del Sabado tarde na parada del Manicahan na Calle Tomas Claudio, Barangay Zone 3, en este ciudad.
El policia local ya nombra con el mga victimas como canda Munjil Insail, 35 años el edad y el chufer, y si Alshariff Basara, 18, el cobrador de pasaje.
Asegun con el policia local, si Insail, quien ya sufri tres irida de bala ya muri na lugar del incidente y si Basara quien ya sufri un irida ya muri mientras bajo na curada medical na hospital.
Base na investigacion, ta espera el mga victimas de ila turno para viaja cuando ya subi el un desconosido armao persona na de ila jeep y ya tira canila dos.
El suspechao ya abaja na jeep del mga victimas y despues ya munta na un motorciclo que ta espera conele y ya corre para na direccion del costa este del ciuidad.
El policia ya recubri cuatro capsula de calibre .45 pistola na lugar del crimen.
El Zamboanga City Police Station 11 ta continua investiga para determina si cosa el motivo y si quien el mga suspechao del incidente. (B. Garcia, photo courtesy of Zamboanga City Police Office)