Total de 513 mga anak de Citizens Armed Forces Geographical Unit (CAFGU) na Basilan el ya recivi regalo durante el celebracion del “9th Festival of Love and Peace” ya inicia el “Save the Children of War Mindanao Association, Inc.” del Sabado.
Durante el celebracion que ya ase na ciudad de Lamitan, ya honra tamen con el sinco miembros del CAFGU quien ya muri y el uno ya salva durante el explosion de un bomba del Julio 31, 2018 na “Magwakit detachment” del militar na Barangay Bulanting ciudad de Lamitan.
Mga anak del CAFGU ya recivi tamen bisicleta y otros pa mga cosas puera con el mga regalo que ya recivi sila. Ya recivi tamen sila comida que ya dale el militar, policia, y mga organisasion civica.
Mga oficiales del govierno y militar ya habla cay importante el contribucion del mga CAFGU na mantencion del paz y securigad na provincia del Basilan.
Asegun con el Congresista Mujiv Hataman cay el mga CAFGU ya demonstra de ila dedicacion para proteje con mga Basileños, parcialmente el rason ta logra paz el provincia.
Ya rindi gracias si Hataman con el Save the Children of War in Mindanao Association, Inc., que ya honra con el como se llama mga “unsung heroes”—el mga CAFGUs y de ila mga anak.
Si Brigadier General Alvin Luzon, el comandante del 101st Infantry Brigade, ya comenda con el mga CAFGU por el de ila critical trabajo na mantencion de paz y esfuerso cay pirmi sila na frontera.
Asegun con Luzon cay el militar ta continua busca manera para ayuda con el mga CAFGU por medio de dale omento pago puera con el existente beneficio ta recivi sila.
Asegun con Luzon tiene tamen otro mga beneficio el militar para del mga CAFGU que ta incluwi ayuda para de salud y “scholarship” para del mga anak de ila.
Asegun con Dr. Arlyn Jawad Jumao-as, el “founder” y presidente del Save the Children of War Mindanao Association, Inc., ya escuji sila honra con mga anak del mga CAFGU este año por el de ila contribucion na seguridad, hablando cay mga CAFGU ta ase grande sacrificio, dejando con el de ila familia cada vez ta rindi sila servicio de seguridad maskin diutay de ila beneficio. (News & photo courtesy by Bong Garcia)