Total de 560 mga vivientes el ya beneficia con el servicios medical, mision dental, y dalida de regalo que ya conduci el 53rd Infantry Battalion (53IB) na uno del mga barangay na municipio de Dumingag, Zamboanga del Sur, asegun con el military Sabado.
Asegun con el 53IB, el actividad ya conduci del Viernes na escuela de elementaria na Barangay Dilud, Dumingag, Zamboanga del Sur.
El actividad ya lleva hunto con el gobierno local, educadores, soldao, y profesionales na cuidada de salud na un esfuerzo concertados para servi con el comunidad.
Asegun con el 53IB, 200 del 560 vivientes ya beneficia desde consultacion medical, 50 servicios dental, 35 ya recivi bacuna de flu, 45 libre cortada de pelo, y 230 ya recivi medicina esenciales.
El 53IB ya habla, ya distribui tamen 200 kits de hygiene, 250 enpaquetao comida, y 215 payong con mga familias necesitadas.
Asegun con el 53IB, el esfuerzo ta demostra el dedicacion para promova buen salud, bienestar, y cuidado comunitario.
El 53IB ya habla, el evento es un testamento del asociacion fuerte entre el gobierno local, militar, y voluntario civilian na atendida del necesidades del comunidad. (B. Garcia)