Un persona listao como un bien “wanted” persona na jurisdiccion del Zamboanga City Police Station 3 (ZCPS3) el ya aresta mga autoridad aqui na ciudad, asegun con el policia local del Viernes.
El policia local ya nombra con el arestao bien wanted persona como si Ronnie Tubosa, 33 años el edad, listao como el segundo bien wanted base na sistema de “E-Warrant”.
Asegun con el policia, con Tubosa ya aresta por medio de implementacion de un orden de aresto mga alas 11:55 del Jueves aga na Purok 5, Barangay Sangali, en este ciudad.
Asegun con el policia, si Tubosa tiene el pendiente orden de aresto por el crimen de matansa sin recomendao piansa que ya dale el un tribunal del ciudad de Zamboanga del Noviembre 15.
El arestao wanted persona ta esta bajo el custodia del ZCPS3 na Barangay Sangali, en este ciudad. (B. Garcia, photo courtesy of Zamboanga City Police Station)