El fuersa militar ya activa con el “1604th Community Defense Center (CDC)” na provincia de Basilan como parte del movimiento para ase mafuersa con fuersa de reserva del Philippine Army (PA).
El 101st Infantry Brigade ya habla del Viernes cay con el 1604CDC ya activa cuando ya visita si Major General Romulo Manuel, Jr., comandante del mando de reserve del PA, na Campo Luis Biel, Barangay Tabiawan, ciudad de Isabela, Basilan.
El Campo Luis Biel amo ta sirvi como el casa del quartel de 101st Infantry Brigade na provincia de Basilan.
Si Brigadier General Alvin Luzon, el comandante del 101st Infantry Brigade, ya conduci un session ejecutivo y dialogo entre mga vistia y oficiales del brigada que ya dale el oportunidad con Manuel articula sobre el presente esfuerzo del mando de reserva para ase mafuersa con el fuersa de reserva del PA.
Na su mensaje, si Manuel ya descuti sobre el potencial del Basilan para reforsa con el fuerza de reserva.
Si Manuel ya expresa su sincero apreciacion con aquellos quien ya extende de ila esfuerza desinteresando para el activacion del 1604CDC.
El 1604CDC bajo mando del 16th Regional Community Defense Group na Bangamoro Autonomous Region in Muslim Mindanao (RCDG-BARMM) que ta encabesa si Coronel Markton Abo.
El mga CDC amo ta mejora, organiza, arma y administra con el Reserve Officers Training Course (ROTC) y “Ready Reserve Units” que ya inclui el mga “Affiliated Reserve Units”.
Si Luzon ya rindi tamen gratitud con Manuel por el visitada na Basilan y por el ayuda que ya extende le na campaña de seguridad del 101st Infantry Brigade. (B. Garcia, photo courtesy of 101st Infantry Brigade)