El Police Regional Office-Bangsamoro Autonomous Region (PRO-BAR) ya inicia cambio na liderato del policia na provincia del Basilan, asegun con el PRO-BAR del Miercoles.
El PRO-BAR ya habla, ya instola con Police Colonel Cerrazid Umabong como el nuevo director provincial del policia na Basilan y ele ya reemplaza con Police Colonel Carlos Madronio.
Si Police Brigadier General Prexy Tanggawohn, el interino director del PRO-BAR, ya encabesa con el ceremonia de entrega de cargos, que ya hace del Martes na Basilan Police Provincial Office (BPPO) na Barangay Menzi, ciudad de Isabela.
Si Madronio ya servi mas de dos años como el director provincial del policia na Basilan.
El Gobernador Hadjiman Hataman-Salliman, quien ya atende con el ceremonia, ya expresa su gratitud con Madronio por su comendable servicio.
Ya dale tamen aseguramiento si Salliman el su todo suporta con el BPPO bajo’l liderato de Umabong.
Mientras tanto, si Tanggawohn ya expresa su apreciacion con el gobierno local y residentes de Basilan por el de ila firme suporta na esfuerzo del mantenimiento de paz y enforsada de ley del PRO-BAR.
Si Tanggawohn ya motiva tamen con el mga personajes del BPPO para esta comitido na valores fundamentales y morales del organizacion mientras activamente ta engrana con el comunidad. (B. Garcia)