Un motorista el ya aresta y valor de P408,000 droga ilegal el ya confisca el mga autoridad na un operacion de aplicacion de ley na provincia del Lanao del Sur, asegun con el policia del Miercoles.
Si Police Colonel Robert Daculan, el director del policia na provincia del Lanao del Sur, ya identifica lang con el arestao suspechao como si alias Omar, residente del Barangay Sampatulog, Alubijid, Misamis Oriental.
Asegun con Daculan, con Omar ya aresta mga alas 7:10 del Lunes aga na Barangay Patani ciudad de Marawi, Lanao del Sur.
Asegun con Daculan, el mga pulis ta conduci checkpoint cuando ya precura desvia canila si Omar, quien ta maneja motorciclo.
El mga pulis ya puede aresta con Omar cuando ya tumba le na camino despues que ya resvala el manibela del su motorciclo na su mano.
Asegun con Daculan, ya recubri na posesion de Omar mas o menos 60 gramos de suspechao shabu enpaquetao na cuatro termosellada transparente sobrecitos plastico con el valor de P408,000, dos tarjetas de identificacion, un bolso de cintura, un celpon, y un motorciclo.
Asegun con Daculan, con el arestao suspechao y mga confiscao evidencia ya lleva na quartel provincial del policia para el propio documentacion y en preparacion para el plantada del caso contra conele por violacion de Ley Integral del Drogas Peligrosas de 2002. (B. Garcia)