Ta ase enbuscada el mga personajes del Guardia Costera de Filipinas o Philippine Coast Guard (PCG) con cuatro tripulantes de quien barco de pesca ya sumi na mar del ciudad de Zamboanga, asegun con un alto oficial del PCG del Viernes.
Asegun con Capitan Larry Cendaña, el comandante del Zamboanga Coast Guard Station, el barco de pesca ya sumi mga alas 2 del Jueves aga na vicinidad del isla de Tumalutab, aqui na ciudad de Zamboanga.
Asegun con Cendaña, el cuatro perdido personas parte del 38 tripulantes de barco de pesca nombra como el RCT-999 que ya sumi na vicinidad del isla de Tumalutab.
Base na investigacion, ta man pesca el RCT-999 cuando ya sumi el barco por causa ya dale con este encuentro grande marijada.
El mga personajes del Coast Guard Sub-Station Sangali enseguidas ya responde usando barco del Oficina de Pesca y Recursos Acuaticos o BFAR y ya puede salva con el 34 del 38 tripulantes.
El mga personajes del PCG ta continua tamen bisia onde lugar ya sumi el barco de pesca para determina si tiene derame de petroleo mientras ta ase enbuscada con el cuatro perdido tripulantes. (B. Garcia, photo courtesy of Coast Guard District Southwestern Mindanao)