Kinse potencial victima de trafico humano el ya salva el mga autoridad na provincia de Tawi-Tawi, asegun con el militar del Domingo.
Asegun con el Naval Forces Western Mindanao (NFWM), con el mga potencial victima ya salva desde tres barco de pasajero del Jueves y Viernes que nuevo lang ya pundia na pantalan del Bongao, el capital del provincia de Tawi-Tawi.
Asegun con el NFWM, el salvao kinse potencial victima de trafico humano compuesto de seis mujeres y nueve hombre.
El joven de todo canila es un 14 años bata hombre y el 52 años hombre el de todo mayor na grupo.
Asegun con el NFWM, el mga victima estaba pa na mga siguientes lugar: Tungawan, Zamboanga Sibugay; ciudad de Dipolog, Zamboanga del Norte; ciudad de Butuan; Molave, Zamboanga del Sur; Panamao, Sulu; Pandami, Sulu; Patikul, Sulu; y Talipao, Sulu.
Base na investigacion, el mga potencial victima ta viaja para na Sarawak, Sabah, para trabaja pasando na provincial de Tawi-Tawi sin el mga necesario documentos.
Asegun, tiene canila quien ya promete oportunidad de trabajo el momento llega sila na de ila destinacion.
Asegun con el NFWM, con el mga salvao individual ya lleva para na estacion del policia de maritima para el documentacion.
Con el mga salvao victima ya entrega na custodia del Oficina Municipal de Bienesta y Desarollo Social del Bongao, Tawi-Tawi para conseja y analiisis de estres. (B. Garcia)