El mga autoridad ya recubri valor de P300,000 smuggled cigarillo na un ciudad na Bangsamoro Autonomous Region in Muslim Mindanao (BARMM), asegun con el policia del Lunes.
Asegun con el Police Regional Office-Bangsamoro Autonomous Region (PRO-BAR), con el mga smuggled cigarillo ya recubri del Domingo na Rio de Bonsain, Purok Barwin, Barangay Mother Kalanganan 2, ciudad de Cotabato na BARMM.
Asegun con el PRO-BAR, el mga pulis del ciudad de Cotabato ya puede recubri con el mga smuggled cigarillo despues que tiene quien ya informa canila cay tiene mga hente ta transporta cigarillo na Rio de Bonsain.
Asegun con el PRO-BAR, el mga pulis del ciudad de Cotabato ya recubri 20 cajon de diferentes clase de smuggled cigarillo que tiene el valor de P300,000.
Asegun con el policia, nohay con quien ya aresta siendo nohay ni un persona el talla na lugar cuando ya llega el mga pulis na Rio de Bonsain na Purok Barwin, Barangay Mother Kalanganan 2, ciudad de Cotabato.
Con el mga cigarillo ya lleva na Police Station 3 del policia na ciudad de Cotabato y hay entrega despues para na custodia del Buro de Aduana para el propio disposicion.
Asegun con el PRO-BAR, ta continua el investigacion para determina si quien el envuelto na transportada del mga smuggled cigarillo. (B. Garcia)