El mga autoridad ya recubri tres saco de seco ojas de marijuana na provincia del Lanao del Sur, asegun con el policia del Domingo.
Asegun con police Colonel Robert Daculan, el director del policia na Lanao del Sur, con el mga saco de seco ojas de marijuana ya recubri mga alas 3:45 del Viernes tarde na Barangay Lumbac Bacayawan na municipio de Lumbatan.
Asegun con Daculan, con el tres saco de seco ojas de marijuana ya encontra el mga miembros de Barangay Peacekeeping Action Team (BPAT) abandonao na canto’y camino.
Si Daculan ya habla, enseguidas mga miembros de BPAT ya reporta na policia cay ya encontra sila tres saco de seco ojas de marijuana que tiene el valor de P30,400.
Con el mga recubrido ojas de marijuana ya lleva na quartel del policia del municipio de Lumbatan para el propio disposicion.
El policia del municipio de Lumbatan ta conduci investigacion para determina si quien el dueño del mga saco de ojas de marijuana. (B. Garcia)