Zamboanga: 57IB tiene nuevo comandante

0
10
photo courtesy of 6ID

El 6th Infantry Division (ID) ya inicia cambio na liderato del 57th Infantry Battalion (IB) que base na provincia del Maguindanao del Norte, asegun con el militar de Domingo.

Asegun con el 6ID, ya designa con Tiniente Coronel Aeron Gumabao como el nuevo comandante del 57IB y ya releva le con Tiniente Coronel Guillermo Mabute, Jr.

Si Major General Alex Rillera, el comandante de 6ID, ya encabesa con el ceremonia del cambio del mando que ya hace del Sabado tarde na quartel del 57IB na Campo Edwards, Barangay Mirab, Upi, Maguindanao del Norte.

Durante el ceremonia, con orgullo ya anuncia si Rillera el mga significante acomplisimiento del 57IB bajo na liderato de Mabute.

Bajo na exemplario mando de Mabute, el 57IB exitosamente ya neutraliza 59 miembros de varias grupo de amenaso, incluido el neutralizacion de canda Ian Dela Rama y Rainjan Villegas, mga alto lideres del rebelde New People’s Army.

Ademas, el batallon ya confisca 165 varias materiales de guerra, demostrando el esfuerzo implacable na mantencion de paz y seguridad na jurisdiccion del 57IB.

Si Mabute, esperansao asumi na mas alto puesto na mando del 6ID porcausa del su extensivo experiencia y liderato na su nuevo posicion. (B. Garcia)

Leave a Reply