El mga autoridad ya puede ya tamen confisca millones valor de smuggled cigarillo y aresta un persona na continuando campaña contra smuggling na provincia del Zamboanga del Norte, asegun con el policia del Jueves.
Asegun con el mando regional del policia, o Police Regional Office-9 (PRO-9), el mas reciente confiscacion de smuggled cigarillo ya hace mga alas 4 del Miercoles aga na Barangay Poblacion, Leon B. Postigo, Zamboanga del Norte.
El policia nohay mas identifica con el arestao persona quien un hombre y de legal el edad.
Asegun con el policia, ya confisca na posesion del arestao persona 102 cajon de cigarillo sin documento que tiene el valor de P5,844,600.
Con el arestao suspechao y el confiscao smuggled cigarillo ya pone bajo’l custodia del policia na municipio del Leon B. Postigo para el propio documentacion y plantada de asunto contra conele.
El aresto y confiscacion de smuggled cigarillo del Miercoles amo el segunda vez ya hace el mga autoridad na municipio del Leon B. Postigo este semana.
El primera vez amo el aresto de dos personas que tiene el edad de 29 y 47 y confiscacion del P7.79 millones smuggled cigarillo del Martes alla tamen na Barangay Poblacion, Leon B. Postigo.
El mando regional del policia ya promete continua el campaña contra actividades de smuggling na region para asegura el proteccion y seguridad economica del comunidad. (B. Garcia)