General Santos City – Namataty gayud sulod sa usa ka pribadong Ospital ning dakbayan sa Gensan ang tag-iya sa usa ka Salon human kini gipusil sa wala ma-ilhing kriminal nga nahitabo alas-6:55 ang takna kagabii lamang, Enero 15, 2025.
Biktima giila sa kapulisan nga si Renante Tampus, 35 anyos, single, residente sa Purok Suiza, Kitanglad street, Brgy. Fatima, General Santos City ug tag-iya sa RENATANARA SALON nga mapalgan sa RD Plaza Mall, Daproza Avenue sa susamang s’yudad.
Sa pasi-unang imbestigasyon sa Pendatun Police Station, nga samtang galingkod ang biktima sulod sa gipanag-iyahan nga Salon sa naasoy nga address usa ka wala ma-ilhing armado nga lalaki
nga nakasul-ob og kolor green nga jacket, naka-kolor blue nga pantalon, naka-kolor yellow nga kalo ug nakatap-tap sa iyang nawong ang hinay-hinay nga misulod sa nasampit nga Salon ug gipusil niini si Tampos nga miresulta sa pagkatarantar sa mga kaubanan niini.
Sa kuha sa video sa usa ka nagpakabana nga indibidwal sa atbang sa gikahitabo-an nga establisemento nadagma pa ang gunman pagsulod niini sa nasampit nga salon atol sa iyang pagpamusil apan abtik kining nakabangon ug gipusil si Tampus sa makadaghang higayon igo sa lain-laing bahin sa iyang kalawasan.
Sa audio sa CCTV klaro kaayong mi-ingon ang biktima ngadto sa usa sa iyang mga kaubanan sa Salon nga: “𝙃𝙖𝙡𝙖 𝙇𝙖𝙣𝙜, 𝙥𝙖𝙩𝙖𝙮 𝙠𝙤 𝙇𝙖𝙣𝙜.”
Human sa hitabo pas-pas nga misibat ang gunman sakay sa naghulat kaniyang motorsiklo ug dali sab dayon gidala ang biktima sa pipila ka nagpakabanang indibidwal ngadto sa Gensan Doctors Hospital sakay sa usa ka tricycle, apan pagka-alas-8:45 ang takna sa gabii sa susamang petsa, gideklara kining patay sulod sa naasoy nga Balay Tambalanan ni Dr. Eluna.
Padayon pa karong nag-imbestiga ang Pendatun PNP aron matumbok kung kinsa ang mipusil-patay sa biktima ug ang motibo niini.
Ang patay’ng lawas sa biktima, anaa karon gipahiluna sa St. Peter Chapels sa National Highway, Brgy. Apopong, General Santos City. (Rem Agdon)
Photos: Pendatun PNP