Total de 37 nuevo comisionao segundos tenientes (Second Lieutenants) el ya completa na Pre-Deployment Training Class 03-2024 del Miercoles na 6th Division Training School (6DTS) na Maguindanao del Norte, asegun con el militar del Jueves.
Ademas, asegun con el 6th Infantry Division (6ID), 100 mga nuevo soldao con el ranggo de Private el ya gradua del Miercoles na 45 dias Infantry Orientation Training (IOT) Class 01-2024.
Asegun con el 6ID, el conjunta graduacion ya conduci del Miercoles na cuartel del 6DTS na Barangay Semba, Datu Odin Sinsuat, Maguindanao del Nore.
Asegun con el 6ID, el 37 nuevo comisionao segundos tenientes compuesto de 30 hombres y siete mujeres.
“Este mga nuevo oficiales y personajes esperansao que hay designa na varias unidades bajo’l 6ID, fortaleciendo el fuerza mientras ta aproxima el Mayo 2025 eleccion,” el 6ID ya habla na un anuncio.
Asegun con el 6ID, el 45 dias IOT, ya concentra para enseña con mga nuevo soldao el habilidades fundamentales por medio de rigoroso ejercisio fisica y mental.
El programa del IOT amo para prepara canila queda soldados expertos capable defende con el teritorio del Pilipinas.
Meintras tanto, el Pre-Deployment Training del mga nuevo comisionao segundos teneientes ya enfatiza el familiarizacion del mga lugar operacional bajo’l Joint Task Force Central.
De ila entreno ya culmina en el certificacion del mga graduados, significando de ila preparacion para el despliegue. (B. Garcia)