Dos personas el ya aresta y valor de P9.4 millones contrabando el ya confisca mga autoridad na un operacion de aplicacion de ley na provincia del Lanao del Sur, asegun con el policia del Jueves.
El Police Regional Office-Bangsamoro Autonomous Region (PRO-BAR) ya identifica con el dos arestao personas como canda alias Al y alias Nor.
Asegun con el PRO-BAR, canda Al y Nor ya aresta del Miercoles na Barangay Piksan, Calanogas, Lanao del Sur.
El policia ya habla, con el mga smuggled cigarillo ya confisca na un vehiculo que ya inspecciona el mga pulis y soldao del 64th Infantry Battalion mientras ta conduci sila checkpoint.
Ya aresta canda Al y Nor despues que ya falla sila presenta documento del de ila cargamento y ya confisca con el mga cigarillo.
Asegun con el policia, total de 570 cajon de cigarillo el ya confisca desde na vehiculo de canda Al y Nor que ta viaja aquel tiempo desde’l municipio de Picong para na ciudad de Marawi, Lanao del Sur.
Asegun con el policia, canda Al y Nor y tambien el mga confiscao contraband ya entrega na custodia del policia del Calanogas para el propio disposicion. (B. Garcia)