El mga autoridad ya confisca valor de P46,404 de diferente clase de prohibido y improvisado rebentador que ta bende na centro del pueblo, asegun con el policia local del Domingo.
Asegun con Police Colonel Alexander Lorenzo, el Zamboanga City Police Office director, con el mga rebentador ya confisca durante el conducida del “Oplan Sita” na distrito central de negocios del ciudad maga alas 12 hasta alas 3 del Sabado tarde y alas 5 hasta alas 9 del Sabado denoche.
Asegun con Lorenzo, nohay puede cuji con el mga vendedor del mga prohibido y improvisado rebentador por causa ya istindi estos y ya abandona con el del ila benta.
Si Lorenzo ya habla, el mga prohibido y improvisado rebentador que ta puede confisca ta include piccolo, “great bawang”, kwitis, “pip-pip” y otros pa.
Asegun con Lorenzo el conducida del Oplan Sita de confirmidad con el Ordinansa 632 que ta permiti usa mga pyrotechnic y ta priva con el uso del mga rebentador.
Con el mga confiscao prohibido y improvisado rebentador ya pone bajo’l custodia del Zamboanga City Police Station 11. (B. Garcia, photo courtesy of ZCPO)