Maga autoridad ya confisca tresientos sincuenta mil de pesos cantidad de contrabando na un campanya contra smuggling aqui na ciudad de Zamboanga.
Asegun con Coronel Richard Verceles, el operations chief del Area Police Command-Western Mindanao, cay con el maga contrabando ya confisca maga alas tres del Domingo aga na mangle del Barangay Talon-Talon, este ciudad.
Asegun con Verceles cay el maga pulis y personajes del Buro de Aduana ta conduci un operacion cuando ya columbra sila un hente muntao na vinta lleno de cahon de cigarillo y ta man saguwan para na canto’y aplaya del Barangay Talon-Talon.
Sin embargo, si Verceles ya habla cay el persona ta man saguwan ya salta para na mar dejando con el vinta y maga contrabando cuando ya puede este columbra con maga autoridad.
El grupo del pulis y personajes del Buro de Aduana ya recubri con el vinta ta carga dies cahon de cigarillo que tiene el valor de tresientos sincuenta mil de pesos.
Asegun con Verceles cay con el vinta y maga cigarillo ya entrega na custodiya del Buro de Aduana para el propio disposision. (Bong Garcia, Jr.)(Photo Courtesy of Area Police Command- Western Mindanao)